DA “I QUIZ UNIVERSALI”

E OGNUNO E’ TRAPEZISTA !

Chesta vita comm’ è fatta ?
Nun se riesce mai a capì !
Ogni juorno te ricatta:
“Nun fa’ ’o fesso: puo’ murì!”.

E ognuno è trapezista,
sempe appiso a’ propria fune,
nun se schianta ’ncopp’ ’a pista
sulamente….. p’ ’a furtuna.

E si fai salti mortali,
pecchè vuo’ pruva’ l’ebbrezza,
tutto riesce naturale
finchè ’a sotto ce stà ’a rezza;

ma si manca ’a protezione
che te dà ’sta sicurezza,
basta sulo ’a distrazione
pe’ cade’ ’a chell’altezza;

e allora guardi ’nCielo,
cu ’nu sforzo sovrumano
e te salvi pe’ ’nu pelo
si affierri chella mano.

E puo’ continua’ ’a pazzia’
fino a che nun vaje ’nfunno,
dondolando ’a ccà e ’a llà,
sorvolanno chistu munno

e guardann’ chi è caduto,
chi s’è appena sfracellato,
o, magari, s’è salvato
ma è rimasto ‘nu struppiato,

pure si faje ’e capriole,
trascinato int’ ’o volteggio,
nun ce servono ’e parole:

“Va bbuono accussì……..

                                                                       …..Signore, non peggio!”

Gambizzato, Marzo 2007

’A camorra
(o mafia, o ’ndrangheta)

’A camorra è ’na cultura
che fiorisce ’nmiezo ’a gente
e se sente cchiù sicura
si se fa cchiù prepotente;

e se spann’ chiano chiano,
cu nu metodo sornione,
comme ’a pioggia fina fina
addeventa ’n’ acquazzone,

perciò tiene appriparato
’e sacchett’ int’ ’o portone,
ah si no, riest’ allagato
quann’ arriva l’alluvione.

E accussì chesta cultura,
mentre inquina ogni coscienza,
cresce comm’ ’a spazzatura
senza limiti ‘e decenza

e saglienn’ … ’o scalone
d’ ’a carriera ’e cammurrista,
se realizza ’a negazione
d’ ’o messaggio ’e Gesù Cristo.

E se credono ’e pazzià,
ma ’e pistole fanno ’o vero,
e accussì vanno a ’follà
’e campetti a ’o cimitero.

Mafia, ’ndrangheta e camorra,
’a matrice è sempe ’a stess’,
pecchè ’o sanghe a fiumi scorre
’nmiezo a ’sta maniata ’e fess’,

che po’ fanno ’n’ esistenza
cu ’na vita media bassa
e nun vedono ’a semenza
quann’ cresce e se fa grossa;

‘e ’o danno procurato
pe’ se stesso e p’ ’a famiglia,
resta comm’ appiccicato
pure a chi era ’nu figlio:

’a camorra è ’na jattura,
che te frena ogni progresso,
e procura ’na sventura
pure pe’ chi vene appriesso.

Ma ’o pericolo cchiù gruosso
è che chesta infezione
trase pure dint’ a l’uosso
e fino all’urdemo neurone,

e ’o paese è devastato
’a ’sta grave epidemia
che colpisce ’o disperato,
’a nobiltà e ’a borghesia.

E si pure int’ ’o ’spidale
cresce chesta mala pianta,
nun ce basta ’o militare
e nemmeno sulo ’nu Santo,

ccà ce serve ’o Pataterno
ch’addà fa’ piazza pulita
pe’ ’e mannà tutt’ all’ Inferno
senza indulto pe’ l’uscita.

Gambizzato, Novembre 2006

DA “I QUIZ UNIVERSALI”

’O PATTO C’ ’O PATATERNO

Ma, ’o Signore esiste o no?
Vola ’ncielo o sta pe’ terra?
Ce perdona sempe o no?
Porta ’a pace o cerca ’a guerra?

Tene ’nmano nu bastone
quann’ aspetta ’a fore ’a tomba?
cu ’na barba ’e nu barbone
e ’na voce che (con voce tonante) rimbomba?

O ce accoglie cu dolcezza?
ce fa pure nu sorriso
e ce dice; (con voce dolce) “Ueh, ’a bellezza!
benvenuto in Paradiso!”

Io me sonno tutt’ ’a scena,
cu S. Pietro a fianco a fianco,
che Le dice areto ’a schiena:
(con voce in sordina) “Sta arrivanno pure Franco!”.

(Il Signore, con voce tonante)   “Finalmente!… Quando passa?
Già mi stavo a preoccupà”.
(S. Pietro, con voce giustificante)   “Ma ’a mugliera nun ’o lassa
pe’ mannarlo…. all’aldiquà;

e s’ ’o stregne forte, forte”.
(voce femminile implorante)   “Nun me po’ lassa’ ccà sola,
e, si chesta add’esse’ ’a sorte,
voglio di’ quacche parola:

“Neh, Signo’, Te voglio bene,
nun puo’ farme stu dispietto,
tanto ’o core nun ’o tene,
si tu ’o cerchi dint’ ’o pietto.

Chillo, ’o core, a me m’ha dato,
pecchè sulo a me… vvò bene,
chillo, a me… m’ha cunsegnato
e mò, isso… m’appartene.

Si t’’o puorte ’nParaviso,
senza core,…. è nu misfatto,
Te conviene ’e fa’ buon viso
si Tu accietti chistu patto:

io t’’o porto,… pure ’o core,
che, ’o saje, nun t’appartiene,
si Tu sciglie bona l’ ora,
pe’ ce fa’ murì’….assieme.

T’ ’o cunsegno, tutto ’o core,
si stasera me prommetti,
che ce fai murì’ d’Ammore,
abbracciati, stritti – stritti;

e si ce puorti ’nParaviso,
cu ’na mano dint’ ’a mano,
e a S. Pietro dai l’avviso:
(con voce tonante)   “Nun ’e fa’ durmì’ luntano !”.

Cecco Gambizzato, Dic 2002

Morale della favola:

“Dio esiste !.
Non sappiamo ancora se ha la barba di un barbone
o se porta in mano un bastone,
ma ora sappiamo che ha la voce tuonante.

Egli fa di tutto per apparire burbero e severo,
ma è molto buono e ci perdona sempre,
perché Dio è Amore
e, in fondo,
è Lui
che ha insegnato a tutti
che è l’Amore a trionfare sempre.”

                       Cecco Gambizzato, Dic 2002